ကွက်လပ်

ကွက်လပ်

(ပထမရက်)

လာကြိုမယ့်သူနဲ့ လေဆိပ်မှာချောချောမောမောတွေ့လိုက်လို့အကုန်အဆင်ပြေသွားတယ်။ ရှစ်နာရီလောက်လေယာဉ်စီးလာရတာဆိုတော့ လူကတော့နုံးနေတာပေါ့။ ဒါပေမယ့် လေယာဉ်ကွင်းကထွက်လိုက်တယ်ဆိုရင်ပဲ အဝေးမှာလှမ်းမြင်နေရတဲ့တောင်မြင့်မြင့်ကြီးတွေကိုကြည့်ပြီးအမောပြေသွားတယ်။

ဒီနေ့တော့ဟော်တယ်ရောက်ပြီးဘယ်မှမသွားဖြစ်တော့။ မနက်ဖြန်မနက်စောစောထွက်မှာဆိုတော့ အိပ်ရတော့မယ်။ ညီမလေးတယောက် စောစောမအိပ်ဘဲ ၀တ္ထုစာအုပ်တွေပဲဖတ်နေမလား။ ညီမလေးကိုအခန်းထဲပဲအောင်းမနေဘဲ ခုလိုသဘာဝရှုခင်းတွေကိုပဲအပြင်လက်တွေ့မှာဖတ်စေချင်လိုက်တာ။

.............

ကိုကို့ကိုလေယာဉ်ကွင်းလိုက်မပို့ဖြစ်ခဲ့။ လိုက်ပို့ရင်ငိုမိမှာဆိုးလို့။ ငါငိုလည်းကိုကိုကတော့သူ့ခရီးစဉ်ကိုဖျက်တော့မှာမဟုတ်တာသိလိုက်ပြီ။ သိပ်ဝမ်းနည်းတာပဲ။ သူ့တောင်တန်းကြီးတွေက ငါ့ထက်သံယောဇဉ်တွယ်စရာကောင်းနေသလား။

---------------------------------

(နှစ်ရက်မြောက်)

မနက်ခုနှစ်နာရီမှာမနက်စာစားပြီး လာကြိုဖို့စီစဉ်ထားတဲ့ဘတ်စ်ကားကြီးနဲ့တောင်ခြေကိုသွားကြတယ်။ ကားစီးရတာ လေးနာရီလောက်ကြာတော့ ကားပေါ်မှာတရေးတမောအိပ်လိုက်ခဲ့ကြတယ်။ တောင်ခြေရောက်တော့ ဘယ်သူမှတောင်မတွေ့တော့ဖူး။ ကြည့်ရတာငါတို့အုပ်စုကနောက်အကျဆုံးထင်တယ်။ ဒါနဲ့ကိုယ့်ကျောပိုးအိတ်ကိုယ်ကောက်လွယ်ပြီးအမြန်တက်ခဲ့ရတယ်။ ညရှစ်နာရီလောက်မှနားရမယ့်တထောက်စခန်းကိုရောက်တယ်။ ဒီမှာက ညနေခုနှစ်နာရီလောက်ဆိုစပြီးမှောင်တော့ တစ်နာရီခရီးကိုလက်နှိပ်ဓါတ်မီးကိုအားထားပြီးတက်ခဲ့ကြတယ်။

သရဲကြောက်တတ်တဲ့ညီမလေးအတွက် ခုလိုခရီးမျိုးထွက်တဲ့အလေ့အကျင့်ရရင်သိပ်ကောင်းမှာပဲလို့တွေးမိတယ်။ အဲလိုဆိုညီမလေးပိုသတ္တိရှိလာမယ်။ ဒီခရီးမထွက်လာခင် “ညီမလေးထက် ကိုကို့တောင်တန်းကြီးတွေကပိုချစ်စရာကောင်းနေတာပေါ့လေ” ဆိုတဲ့ ညီမလေးစွပ်ဆွဲချက်ကိုပြန်ကြားနေမိတယ်။ တကယ်တော့တောင်တန်းတွေကြားငါပျော်သလိုညီမလေးကိုလည်းပျော်စေချင်တယ်။

............

“ညီမလေးကတသက်လုံးကိုကိုနဲ့ပဲနေမှာနော်”

“အေး ... နေရမှာပေါ့”

ဆေးလာတိုက်တိုင်းပြောတဲ့စကားတွေပြန်တွေးကြည့်တိုင်းယူကျုံးမရဖြစ်တယ်။ ငါကသူ့ကိုတသက်စာအတွက်အားကိုးတယ်ဆိုတာသိသားနဲ့။ သူပဲငါ့အနားမှာပြုစုလာတာ။ ခုတော့ငါတယောက်တည်းနေရတော့မယ်။ နေတတ်အောင်နေရတော့မယ်။

-------------------------------------

(သုံးရက်မြောက်)

တောင်ထိပ်ကို မနက်လေးနာရီမှာရောက်တယ်။ ပြီးတော့ နေထွက်တာကိုထိုင်ကြည့်ကြတယ်။ တိမ်တွေနဲ့အတူထိုင် နေမင်းကိုကြိုဆိုခွင့်ရတဲ့မနက်ခင်းဆိုတာ ဘယ်လောက်ခံ့ညားသလဲဆိုတာညီမလေးကိုမြင်စေချင်လိုက်တာ။ နောက်ပြီးအဲဒီနေရာက ညီမလေးချစ်တဲ့ကောင်းကင်ကြီးနဲ့အနီးကပ်ဆုံးနေရာပဲ။ လေတွေကတိုက်တာလည်းအရမ်းပဲ။

..........

ကိုကိုကတော့သူ့တောင်တွေကြားအပျော်မြူးပြီးငါ့ကိုမေ့နေလောက်ပြီ။ ဘာပဲဖြစ်ဖြစ် ကိုကိုပျော်မယ်ဆိုရင် ငါလည်းနေတတ်ရမှာပေါ့။ လူဆိုတာတယောက်တည်းမွေးလာတာပဲ။

ဒါပေမယ့် ငါတို့မှာ ဒီမောင်နှမလေးနှစ်ယောက်ပဲရှိတာ။ ကိုကိုမရှိရင် ငါဘယ်သူနဲ့သွားနေရမလဲ။

------------------------------------

(လေးရက်မြောက်)

ညီမလေးဆေးတွေသောက်ရဲ့လား။ တနေ့လုံးအခန်းထဲအောင်းနေမလား။ ဖုန်းဆက်မေးရင်ရော အသံကြားတာနဲ့ငိုနေမလား။ သူငိုတာကြားရင်အရမ်းစိတ်မကောင်းဘူး။

မနက်ဖြန်ပြန်တော့မှာပဲ။

................

ကိုကို ငါ့ကိုသတိမရတော့ဖူး။ သူ့တောင်တန်းတွေကြားအပျော်လွန်နေပြီ။

မနက်ဖြန်ပြန်ရောက်လာတော့မယ်။

---------------------------------

(ငါးရက်မြောက်)

လူကပင်ပန်းနေပေမယ့်စိတ်ကတော့လန်းဆန်းနေတယ်။ ညီမလေးကြိုက်တတ်မယ့်လက်ဆောင်ထုတ်တွေကြည့်ပြီး အားရမိတယ်။ လက်ဆောင်တွေမြင်ရင် ညီမလေးပျော်လောက်ပါရဲ့။

.........

ကိုကိုပြန်လာတော့မယ်။ ဘယ်တော့ပြန်ထွက်သွားဦးမလဲ။

---------------------------------

“ညီမလေးအတွက်အမှတ်တရလက်ဆောင်တွေဝယ်လာတယ်။ ကြိုက်ရဲ့လား။”

“အင်း ...”

“ညီမလေးနေကောင်းရဲ့လား”

“ကောင်းပါတယ်။ ခါတိုင်းလိုပဲပေါ့”

......
......
......

“ညီမလေး ဒီမှာကိုကိုရိုက်လာတဲ့ပုံတွေ။ လှလိုက်တာ။ ဒီပန်းပင်တွေကလေ တောင်တက်လမ်းမှာပေါက်နေတာတွေပေါ့။ ဟောဟိုမှာ ရှဥ့်လေးတွေ့လား ... အမြန်ရိုက်လိုက်ရတာ။ ဓါတ်ပုံထဲပါလာလို့တော်သေးတယ် ... xxxx ..... xxxx”

“အင်း ... သြော် ... ဟုတ်လား ... အင်း ကောင်းတာပေါ့နော် .... xxxx ... xxxx .. ”

----------------------------------

(ခြောက်ရက်မြောက်)

ဤအိမ်တွင်လူနှစ်ယောက်နေထိုင်ကြသည်။

မနက်မိုးလင်းသောအခါ မနက်စာစားပြီးပြီလား ဆေးသောက်ပြီးပြီလားစသောမေးခွန်းများကိုတယောက်ကမေးပြီး ကျန်တယောက်ကဖြေသည်။ ထို့နောက် တယောက်ကအခန်းထဲဝင်ပြီးစာဖတ်ခါ ကျန်တယောက်ကကွန်ပြူတာရှေ့ထိုင်ပြီး တောင်တန်းများနှင့်ပြည့်ကျပ်နေသောဓါတ်ပုံများကို ကြည်နူးမှုအပြည့်နှင့်ကြည့်နေသည်။

နေမွန်းလွဲသောအခါ တယောက်ကထမင်းစားရန်ခေါ်သော်လည်း စာဖတ်နေသောတယောက်ကမဆာသေးဟုငြင်းဆိုသည်။ ထမင်းစားခေါ်သောသူ စားသောက်ခြင်းပြီးဆုံးမှ ကျန်တယောက်ကအခန်းထဲမှတိတ်တဆိတ်ထွက်စားသည်။

ထိုတနေ့တာပြီးဆုံးတော့မည်။ အိမ်အတွင်းရှိလူနှစ်ယောက်လုံးအိပ်ယာပေါ်လှဲယောင်းနေသည်။

တယောက်က တောင်တွေအလှကိုခံစားတတ်ဖို့မကြိုးစားတဲ့ သူ့ညီမလေးအတွက်ဝမ်းနည်းနေသည်။ ထောင်နဲ့ချီရိုက်လာသောဓါတ်ပုံများက သူ့ဘေးမှကွန်ပြူတာစခရင်ထက် -- “ငါပြနေရင်လည်း ငါကြိုက်လို့ အကုန်ကောင်းတာပဲမြင်နေတယ်လို့ထင်သွားမှာပဲ” ။ တောင်တွေနဲ့သူ့ညီမလေးကြား ရွေးချယ်မှုဆိုတာ ဘယ်တုန်းကမှသူမလုပ်ချင်ခဲ့။ သို့သော် သူ့ သိစိတ်နှင့် မသိစိတ်ကလုပ်ခဲ့ပြီးကြောင်း သူသိလိုက်ရသောအခါ အပြစ်ကျူးလွန်ထားသူတယောက်လိုစိတ်ထဲနုံးချိသွားရသည်။

ကျန်တယောက်ကတော့ သူမအမြဲအားကိုးရသောအစ်ကို တောင်တွေနဲ့ဘ၀ကို သူမထက်ပိုချစ်နေကြောင်းတွေးရင်းမျက်ရည်ကျနေသည်။ ငိုရသည့်ရက်ပေါင်း အိပ်မပျော်သည့်ညပေါင်း သူမအတွက်များလှပြီ -- “သူ့တောင်တွေကြားမှိုင်းမိနေပြီ။ ငါ့ကိုထားသွားရစ်နိုင်ပြီ။ သူပျော်တယ်ဆိုလည်း ကျေနပ်ရမှာပေါ့” ထိုအတွေးနဲ့အတူ သူမရင်ဘတ်ထဲမှာအောင့်ခနဲ။

---------------------------------

(ခုနှစ်ရက်မြောက်)

ဤအိမ်တွင် လူနှစ်ယောက်နေထိုင်ကြသည်။

တယောက်ကပြောသည် - “ကိုကို့တောင်တွေကိုကြည့်ဖို့ဘယ်တော့မှမလိုက်ဘူး။ ဒီမှာညီမလေးဘာသာပျော်ပျော်နေနိုင်တယ်။ စိတ်မပူနဲ့။ ကိုကိုလုပ်စရာရှိတာသာလုပ်ပါ”

ကျန်တယောက်ကသက်ပြင်းချသည် - “တောင်တွေကြားက ထင်သလောက်မဆိုးပါဖူးညီမလေးရယ်” ။ ခပ်တိုးတိုးဆုတောင်းမိသည် ... “တနေ့တော့ညီမလေးငါ့ကိုနားလည်ကောင်းပါရဲ့” ။

သို့သော် သူတို့ကြားမိုင်ပေါင်းများစွာဝေးနေသောအချိန်ကြာမြင့်လှပြီ။ တယောက်က တောင်တွေကိုတစ်သက်စာအတွက်ချစ်တတ်သွားပြီး ကျန်တယောက်က တောင်တွေ၏တန်ဖိုးကိုနားမလည်နိုင်သော (သို့) နားလည်ဖို့မကြိုးစားသောအချိန်မှစ၍။